Skíðablaðið 2025 komið út

Forsíða Skíðablaðsins 2025

Skíðablaðið 2025, í ritstjórn Sigríðar Láru Gunnlaugsdóttur, er komið út. 

Blaðið er efnismikið að vanda, en meðal efnis er rannsóknaritgerðir um orðið skíðafélags, eðlisfræði snjógirðinga og sögu skíðasvæðisins í Tungudal. Langa viðtalið er við Jóa Torfa, sem áratugum saman sinnti ýmsum hlutverkum í uppbyggingu skíðaíþróttarinnar. Þá er ýmislegt annað góðgæti í blaðinu.

Blaðið er borið út í hús á Ísafirði, en er einnig aðgengilegt í skíðaskálanum á Seljalandsdal og á almenningsstöðum. Vefútgáfu blaðsins er hægt að finna undir "útgefið efni" hér á vefnum, en þar er einnig hægt að skoða eldri blöð. 

Skíðamót Íslands í skíðagöngu

Ísfirski hópurinn. Frá vinstri Ástmar Helgi, Eyþór Freyr, Dagur Ben, Heimir Logi, Grétar Smári, Snorri, Saga, Þórey, Vigdís Birna. Fremri röð: Esja Rut, Sunna, Sölvey, Freyja Rós.

María Sif, Saga, Sölvey, Þórey

Einar Árni, Dagur, Ástmar

« 1 af 3 »

Skíðamót Íslands fór fram í Hlíðarfjalli á Akureyri síðastliðna helgi. Skíðafélag Ísfirðinga átti glæsilegan hóp keppenda, alls 12 talsins, sem stóðu sig frábærlega. Mótið gekk vel fyrir sig, blíðskaparveður, sól, blíða og flottar aðstæður í Hlíðarfjalli. Við þökkum Akureyringum kærlega fyrir flott mót.

Á fyrsta keppnisdegi var sprettganga.  Í karlaflokki náðu keppendur SFÍ öllum efstu þremur sætunum: Dagur Benediktsson sigraði, Snorri Einarsson hafnaði í öðru sæti og Ástmar Helgi Kristinsson í því þriðja. Keppnin var afar spennandi og aðeins hársbreidd skildu að annað til fjórða sætið.
Í yngri flokkum stóðu okkar iðkendur sig einnig mjög vel. Í flokki 15-16 ára stúlkna röðuðu þrír  Ísfirðingar sér á pallinn þær María Sif Hlynsdóttir, Sölvey Marie Tómasdóttir og Saga Björgvinsdóttir.

Á öðrum degi mótsins var keppt með hefðbundinni aðferð í vegalendum frá 3,5 upp í 10 km. Dagur sigraði karlaflokkinn eftir harða keppni við Einar Árna Gíslason frá Akureyri og Ástmar fylgdi þeim fast á eftir og hafnaði í þriðja sæti.  Keppendur í yngri flokkum skiluðu góðum árangri og gaman var að sjá bætingar hjá þessum hópi.

Á lokadeginum var keppt með frjálsri aðferð. Þar sigraði Dagur enn á ný og tryggði sér þar með þrjá Íslandsmeistaratitla á mótinu. Í karlaflokki átti SFÍ fjóra af fimm efstu keppendum, sem er frábær árangur. Keppendur félagsins voru ánægðir með mótið og árangurinn, uppskeran var sannarlega góð.

Á Skíðamóti Íslands eru krýndir bikarmeistarar vetursins. Úr okkar hópi urðu Grétar Smári, Eyþór og María Sif eru bikarmeistari veturinn 2025 í sínum flokkum.

Við óskum öllum til hamingju með sinn árangur um helgina og það sem af er vetri! Það er gaman að sjá gróskuna í skíðagöngu á landsvísu og vaxandi þáttöka á skíðagöngumótum. Hópurinn í skíðagöngunni er samheldinn og stemningin góð. Dagskráin eftir keppni var fjölbreytt og skemmtileg.  Farið var í sund, út að borða, í bíó og síðan voru haldin spilakvöld með keppendum úr öðrum liðum. Slíkar samverustundir styrkja tengslin og gera upplifunina enn betri.

Öll úrslit frá SMÍ er að finna hér

Fossavatnsgangan er framundan!

Á drykkjarstöð í Fossavatnsgöngunni

Á bikarmóti Alpagreina

Á bikarmóti í Skíðagöngu

« 1 af 3 »

Það að vera í Skíðafélag Ísfirðinga er ekki bara það að æfa heldur líka að vera hluti af frábæru og gefandi samfélagi. Hér vinnum við öll saman og eflum félagsandann og til að hlutirnir gangi upp þarf mörg handtök.

Fossavatnsgangan er eitt af stóru verkefnum okkar og styrkir gangan barnastarfið okkar í SFÍ þvert á allar deildir. Það er því virkilega mikils metið að allir séu tilbúnir í sjálfboðaliðastarfið sem fylgir því að halda svona stóra göngu. Hjálpa til við uppsetningu, baka fyrir kökuhlaðborð, vinna við kökuhlaðborð og taka þátt í frágangi. Bæði gangan og kökuhlaðborð eru rómuð um allan heim og er þetta sameiginlegt verkefni okkar allra sem komum að SFÍ.  Við hjá SFÍ erum einstaklega heppin með okkar öflugu sjálfboðaliða sem gerir það að verkum að það er gaman og gefandi að vera þátttakandi í starfinu.

Við viljum hvetja ykkur til að taka þátt í þeim verkefnum sem óskað er eftir aðstoð og auðvitað hvetjum við ykkur líka og koma og fagna og uppskera á lokahófi Fossavatnsgöngunnar þar sem ekki bara skíðamenn heldur allir sem koma að skíðaíþróttinni hér á Ísafirði koma saman og fagna.  Miða á lokahófið er að finna á síðu Fossavatnsgöngunnar hér.

Meðylgjandi í fréttinni er brot af þeim sjálboðaliðum sem hafa hjálpað okkur í starfinu.

Skíðafélag Ísfirðinga með fulltrúa á HM unglinga og á Vetrarólympíuhátíð Æskunnar

Ástmar, Grétar og Eyþór á æfingu í Naustahvilft

Þrír iðkendur SFÍ verða á faraldsfæti í byrjun febrúar n.k. Þeir Grétar Smári Samúelson og Ástmar Helgi Kristinson munu keppa fyrir Íslands hönd á heimsmeistaramóti unglinga í skíðagöngu (JWSC) sem fer fram á Ítalíu dagana 3.-9. febrúar. Með þeim í för verður annar SFÍ-ari, hann Guðmundur Rafn Kristjánsson, Muggur, sem mun fara með hópnum og sjá til þess að keppendurnir hafi fyrsta flokks skíði og rennsli.

Þá fer Eyþór Freyr Árnason með hópi íslenskra skíðakrakka á Vetrarólympíuhátíð Evrópuæskunnar (EYOF) sem fram fer Í Georgíu dagana 8.-17. febrúar. Til gamans má nefna að einn af þjálfurum hópsins er gamall SFÍ-ari, Ólafur Thorlacius Árnason.

Það er mikill heiður fyrir iðkendur að vera valin til þátttöku á slíkum mótum og óskum við þeim innilega til hamingju og hlökkum til að fylgjast með ykkur.

Bikarmót í skíðagöngu á heimavelli

Ísfirðingarnir María Sif Hlynsdóttir, Sölvey Marie Tómasdóttir og Saga Björgvinsdóttir í brautinni. Mynd: Björgvin Hilmarsson (retro_outdoors)

Um helgina fór fram Bikarmót SKÍ á Seljalandsdal. Mótshald gekk eftir áætlum og stóðu keppendur sig vel. Rúmlega 40 keppendur mættu til leiks. Veðrið var gott og snjóalög góð en ekki varð úr rigningu sem hafði verið spáð.  

Fyrsti keppnisdagur var á föstudegi en þá var á dagskrá frjáls aðferð með einstaklingsstarti, keppt var í vegalengdum frá 3.5km, 5km og 7.5 km. Okkar fólk stóð sig vel í brautinni og við Ísfirðingar áttum tvo bikarmeistara þau Maríu Sif Hlynsdóttur og Eyþór Frey Árnason sem sigruðu sinn aldursflokk. 

Á öðrum keppnisdegi var keppt í sprettgöngu með frjálsri aðferð. Sprettbrautin var aðeins með breyttu sniði í ár með virkilega krefjandi brekku og nýrri aðkomu að marksvæðinu og ánægja var með breytingarnar. 

Keppt var í hefðbundinni göngu með hópstarti á síðasta keppnisdegi. Þá var gengið eftir aldursflokkum 3.3km, 5km og 10km. Eins og þekkt er er 5km hringurinn á Seljalandsdal virkilega krefjandi keppnishringur með löngu klifri og krefjandi rennsli. Það reyndi vel á keppendur sem stóðu sig vel. Ýmsar uppákomur voru í brautinni þennan daginn en stæðstu áskorunina fékk Grétar Smári Samúelsson sem þurfti að skipta tvisvar um skíði og einu sinni um stafi. Hann skilaði þó góðri göngu og lét þetta ekki spilla deginum. Ísfirðingarnir stóðu sig vel í brautinni og sýndu góðan karakter. 

Við hjá SFÍ þökkum fyrir samveruna á Seljalandsdal um helgina og hlökkum til komandi skíðaveturs. 

Úrslit helgarinnar má finna hér:  https://timataka.net/fismot2025-isafjordur-januar/ 

Myndir má finna á fb síðu mótsins, hér: https://www.facebook.com/events/1340525077375636/?active_tab=discussion