Skíðamaður ársins 2013

Guðmundur Sigurvin Bjarnason fæddur 1997 er skíðamaður ársins hjá SFÍ

Guðmundur Sigurvin Bjarnason var afar sigursæll á nýliðnu ári. Auk fjölmargra sigra á heimamótum tók hann þátt í 8 göngum á bikarmótum Skíðasambands Íslands og hlaut í þeim alls fern  gullverðlaun og fern silfurverðlaun. Guðmundur varð bikarmeistari Skíðasambands Íslands í sínum aldursflokki, auk þess að verða fjórfaldur Íslandsmeistari 15-16 ára unglinga. Hann toppaði svo frábæran vetur með því að verða fyrstur allra keppenda í mark í 20 km göngu Fossavatnsgöngunnar. Hann hefur stundað gönguskíðin frá 1.bekk grunnskóla

Guðmundur er mikill fyrirmyndarunglingur. Hann er reglusamur og stundar æfingar af áhuga og samviskusemi.  Auk skíðagöngunnar tekur hann virkan þátt í starfi Björgunarfélags Ísafjarðar þannig að óhætt er að segja að hann sé öðrum, bæði yngri og eldri, frábær fyrirmynd.

Aðalfundur Fossavatnsgöngunnar 12.janúar 2014

Fundarboð

Aðalfundur Fossavatnsgöngunnar verður haldinn á Hótel Ísafirði kl.17:00 sunnudaginn 12.janúar 2014.

Dagskrá:

1.       Skýrsla stjórnar

2.       Kosningar

3.       Önnur mál

Stjórnin

Boðganga SFÍ frestast

Ákveðið hefur verið að fresta boðgöngu SFÍ sem átti að vera í dag til 14.janúar kl. 18:00

Æfingar alpagreina Íþróttaskóla HSV að hefjast

Á morgun miðvikudag 7. janúar kl 17.00 hefjast loks æfingar alpagreina í Íþróttaskóla HSV. Allir krakkar í 1.- 4. velkomnir ásamt fimm ára börnum í fylgd með foreldrum. Elín Martha Eiríksdóttir hefur umsjón með æfingum, ásamt Hafrúnu Jakobsdóttur og Regínu Sif Rúnarsdóttur.

Loksins, loksins

Nú ættu skíðamenn að geta tekið gleði sína á nýju ári. Hryssinglegu veðri undanfarinna tveggja vikna er að slota og mikill snjór kominn á Seljalands- og Tungudal. Ljóst er að mikil vinna liggur í troðslu eftir svo mikla ofankomu og því viðbúið að nokkurn tíma taki að koma svæðunum í topp stand. Stefnir jafnvel í að svæðin verði opnuð á morgun miðvikudag með einhverjum takmörkunum þó.