Púkamót Íslandsbanka á skíðum

Púkamót Íslandsbanka á skíðum verður haldið næstkomandi laugardag. Keppt verður bæði í göngu og í alpagreinum. Mótið er fyrir Íþróttaskóla HSV og iðkendur Skíðafélagsins upp að 13 ára aldri. Allt verður mótið með léttu yfirbragði, leikjabrautir og sprell. Keppni hefst í alpagreinum í Tungudal kl 11.00 fyrir börn í Íþróttaskóla og kl 13.00 fyrir eldri krakka. Á Seljalandsdal mun gangan hefjast kl. 12.00.

Að móti loknu mun Íslandsbanki bjóða öllum þátttakendum frítt í bíó.

LS mótinu frestað

LS mótinu sem áætlað var að færi fram miðvikudaginn 5/2 er frestað um óákveðinn tíma. Við komum með nýja tímasetningu fljótlega

Kátir krakkar í Tungudal

Mikið fjör var í skíðaskálanum í Tungudal þegar krakkar skíðafélagsins gistu þar aðfaranótt laugardagsins. Þar voru á ferð bæði göngu- og svigskíðakrakkar, tíu, ellefu og tólf ára. Þrátt fyrir leiðindaveður var fjör í brekkum þar sem brugðið var á leik á skíðum, brettum og sleðum. Um kvöldið var svo haldin kvöldvaka með leik og sprelli. Er hætt við að einhverjir hafi farið seint að sofa í þetta sinn.   

Samstarfssamningur við Íslandsbanka

Frá undirritun samningsins.

Á dögunum undirrituðu Skíðafélag Ísfirðinga og Íslandsbanki samning um áframhaldandi samstarf við uppbyggingu og eflingu skíðaíþróttarinnar í sveitarfélaginu. Íslandsbanki hefur um árabil verið helsti stuðningsaðili félagsins og með undirrituninni var staðfest að þetta farsæla samstarf mun halda áfram a.m.k. næstu tvö árin. 

Viðstödd undirritunina voru þau Hallgrímur Magnús Sigurjónsson og Freygerður Ólafsdóttir frá Íslandsbanka og þær Jóhanna Oddsdóttir og Sigríður Sigurðardóttir frá SFÍ.

SFÍ gangan á miðvikudag

SFÍ gangan fer fram á miðvikudaginn kemur, 29. janúar. Keppt verður með hefðbundinni aðferð í öllum aldursflokkum. Mótið hefst kl. 18:00 og verða aldursflokkar 11 ára og yngri kláraðir fyrst. Strax þar á eftir klárum við flokka 12- 15 ára og loks 16 ára og eldri. Skráning fer fram á staðnum og er fólk beðið að mæta tímanlega.

Aldursflokkar og vegalengdir verða sem hér segir:

7 ára og yngri      (u.þ.b. 600 m)

8-9 ára                (u.þ.b. 800 m)

10-11 ára             (1,5 km)

12-13 ára             (2,5 km)

14-15 ára             (3,75 km)

16-17 ára             (7,5 km)

18-34 ára             (7,5 km)

35-49 ára             (7,5 km)

50+                     (7,5 km)

ATH að ekki er viðhöfð tímataka í flokkum 9 ára og yngri, þ.e.a.s. hjá krökkum í íþróttaskóla HSV.