Þrír úr SFÍ í U-21 úrvalsliði skíðagöngufólks

Skíðasamband Íslands tilkynnti á dögunum val á landsliði Íslands í skíðagöngu. Líkt og undanfarin ár er A landsliðið skipað tveimur mönnum, þeim Brynjari Leó Kristinssyni frá Akureyri og Sævari Birgissyni úr Skíðafélagi Ólafsfjarðar. Eins og margir muna á Sævar ágæta tengingu hingað vestur, en hann þjálfaði skíðagöngulið SFÍ fyrir fáum árum.

Einnig tilkynnti Skíðasambandið val á U-21 hópi, sem er úrvalslið yngra skíðagöngufólks. Í þeim hópi eru fjórir einstaklingar, þar af þrír úr SFÍ. Ísfirðingarnir í hópnum eru þeir Albert Jónsson, Dagur Benediktsson og Sigurður Arnar Hannesson. Að auki er Jónína Kristjánsdóttir frá Ólafsfirði í þessum úrvalshópi.

U-21 hópsins bíður skemmtilegur vetur með spennandi verkefnum. Þar ber hæst að hópurinn mun keppa á einu til tveimur FIS mótum í Noregi eða Svíþjóð, auk þess sem þau eiga möguleika á að vinna sér inn keppnisrétt á „Youth Olympic Games“ í Lillehammer.

Steven þjálfar skíðagönguliðið í vetur

Gengið hefur verið frá áframhaldandi ráðningu Steven Patric Gromatka sem þjálfara skíðagönguliðs SFÍ. Steven, sem er Bandaríkjamaður, kom til félagsins haustið 2014 og ríkir mikil ánægja með störf hans. „Það vara mikill happafengur að fá Steven til okkar. Hann er ástríðufullur þjálfari, mjög jákvæður og uppbyggilegur, nær vel til krakkanna og er góð fyrirmynd. Við lögðum því mikla áherslu á að halda honum hjá félaginu“ sagði Einar Ágúst Yngvason, formaður göngunefndar SFÍ eftir að ráðningin hafði verið staðfest.

Skíðagöngukrakkar 12 ára og eldri hafa æft af kappi í allt sumar undir handleiðslu Steven. Um áramótin heldur hópurinn svo væntanlega til útlanda í æfingabúðir áður en sjálf vetrarvertíðin hefst af fullum krafti.

Aðalfundur SFÍ 2015

Aðalfundur Skíðafélags Ísfirðinga fer fram í skíðaskálanum í Tungudal miðvikudaginn 27. maí nk og hefst kl. 20. Á dagskránni verða venjuleg aðalfundarstörf:

• skýrsla stjórnar
• reikningar félagsins
• kosning stjórnar
• önnur mál

Félagsmenn eru hvattir til að fjölmenna á fundinn.

Skíðavikan: Breyting á dagskrá á Seljalandsdal

Búið er að gera svolitlar breytingar þeim hluta Skíðavikudagskrár sem fram fer á göngusvæðinu á Seljalandsdal. Breytingarnar eru þessar:

• Ekki verður nein skipulögð dagskrá á Seljalandsdal á föstudaginn langa.
• Á laugardag verður aftur á móti mikið um að vera. Þá verður furðufatadagur og kl. 13:00 hefst páskaeggjamót fyrir börn fædd 2003 og síðar. Kveikt verður upp í grillinu um svipað leyti. Að páskaeggjamótinu loknu verður svo haldið garpamót í göngu.

Skíðablaðið 2015

Skíðablaðið 2015 er nú að renna í gegnum prentsmiðjuna og verður tilbúið til dreifingar eftir helgina. Gert er ráð fyrir því að blaðið verði borið út á þriðjudag og miðvikudag. Það er Skíðafélag Ísfirðinga sem gefur blaðið út. Líkt og undanfarin ár verður leitað til félagsmanna um útburð á blaðinu. Nánari upplýsingar verða birtar hér á vefnum og á Facebook eftir helgina.